سلام عليكم خواتي و اخواني
اشلونكم, ان شاءالله كلكم بخير الحمدلله.

تعرفون المثل اللي يقول ""بعد ما شاب ودوه الكتاب""
الحمدلله بعد ما كنت بطالية و قاعده بالبيت لا شغله ولا مشغله الحمدلله الله سهل اموري و سجلت في خوش جامعه.

جامعة الجزيرة

الجامعه جديده و مبناهم بالطوار دبي, نفس المبنى مال جامعة زايد سابقا. و دشيت مبانيها وايد حلوه و شرحه ماشاءالله.
و اهم شي كان بالنسبة لي انها معترف فيها, و بدخولي هالجامعه ما راح اضغط على زوجي بالمصاريف. لأنه رسومها و لله الحمد تعتبر معقولة جدا مقارنة بجامعات ثانية. الماده 2700 درهم. يعني اذا راح آخذ 4 مواد و ماراح اكثر عن جذي علشان اعيالي اقدر اجابلهم راح يطلع بالكورس ان شاءالله 10800 درهم يعني بالسنه تقريبا 21 الف و 600 درهم.

و شي ثاني انه الجامعه تقبل كل اللي متخرجين من الثانويه من سنة الطفحه نفس حالتي. يعني اذا اي وحده فيكم متخرجه من زمان و ما سمحت لها الظروف انها اتكمل. حياكم خواتي كملوا وياي
و لنرفع شعار الجامعه "" العلم لا يعرف سنا ولا نسبا ولا لونا ""

قالولي عندهم تخصصات يديده و هذا شي حلو و مميز واللهو ان شاءالله انا قررت على تكنولوجيا المعلومات, و دراسته بالانجليزي يعني لازم امتحن توفال و اييب فوق 500 ان شاءالله. و الله لا يقول ما قدرت عندهم مواد تأهيل علشان نرفع من مستوانا في الانجليزي.
و شي بعد اللي عندها دبلوم و تبي تكمل تقدر تكمل. يعني ماشاءالله مسهلينها علينا من كل النواحي.
الله يسهل امورنا و امورهم يارب و يوفق الجميع ان شاءالله.

اي سؤال انا حاضره و بالخدمه و اللي تبي تسجل ضروري تقولي علشان اساعدها و ان شاءالله خير يارب.